政情：政府總部戒嚴封城
聽日就係煲呔曾與「五區公投」總發言人余若薇（Audrey）辯論政改嘅大日子，除咗煲呔曾心戰室已經進入咗緊張狀態，為咗阻擋聲言要追擊煲呔曾嘅八十後青年，決戰地點政府總部（ＣＧＯ）由今晚起會進入一級戒備，嚴防有人生事。
立法會尋日特別發出文件，同議員交代聽日ＣＧＯ嘅保安安排，聽日全日都禁止立法會議員嘅座駕進出停車場，而由今晚十一點到聽日全日，無論議員、議員助理定記者，全部都要經ＣＧＯ雪廠街入口出入，如果咁啱冇帶通行證，尊貴嘅議員都要核對身份證先可以入去。就算有市民想搵議員申訴，都一定要由議員辦事處職員事先向行政署報咗名嘅訪客先可以入ＣＧＯ。
記者聽日採訪都限制多多，除咗唔准同煲呔曾同處一室，辯論後嘅記者會仲規限人數，規矩多到令人不敢想像。煲呔曾依家最怕群眾，保安嚴十倍，都係唔想有群眾可以包圍政府總部，凡此種種，都係煲呔曾虛怯嘅表現。