政情：煲呔曾拍短片都睇貓紙
煲呔曾早前「騎劫」東區區議會一項休漁期活動，上台搶咪同反對政改方案嘅示威者對罵，除咗被指帶頭違反區會資助活動唔可以有政治性嘅指引、以及喺休漁期嗌「起錨」勁唔老利之外，仲畀人踢爆佢連搶咪鬧人都要睇貓紙，認真失禮兼冇誠意。
一分鐘六次
尋日煲呔曾又喺港府嘅「起錨」facebook度，上載咗一套題為「最緊要做到問心無愧」嘅片段。片長僅有兩分鐘，其中一半都係煲呔曾落區時畀示威者包圍怒罵嘅片段，當中夾雜咗唔少以dood dood聲遮蓋咗嘅粗口，另一半就係佢懶係語重心長咁，話現時香港民主嘅情況就似佢落區咁，畀人重重圍住動彈不得，令人好心噏。佢又反問自己點解咁蠢，明知畀人鬧都落區，但最後並無提供答案。
不過成條片最經典嘅，唔係煲呔曾喺度自說自話扮慘博同情，而係佢喺短短唔夠一分鐘嘅讀白內，居然都前後偷睇咗六次貓紙。連拍廣告都要睇稿，呢啲咁嘅九流推銷員真係應該炒咗佢！