政情：孫公Sell政改拋錨露底

立法會變垃圾會

尋日率先致辭嘅梁定宇講到，港府即將提交修改特首及立法會產生辦法嘅議案畀立法會，但講到立法會時，竟然衝口而出彈咗「垃圾」兩個字出嚟，搞到場面既搞笑又尷尬，梁定宇惟有笑笑口咁話「唔好意思」嚟解窘。

隨後輪到孫公上場，佢手執《基本法》、心口掛上「起錨」襟章，以一貫老油條嘅腔調發言，講講吓佢仲話：「如果我哋唔好好把握二○一二年呢兩個選舉嘅發展機會，向前踏出一步；到二○一七或者二○二○，我哋就無可能進行普選！」

港府同中央一直強調，今次政改方案通過與否，都唔係一七、二○年普選嘅先決條例，即係一單還一單計，連全國人大常委會副秘書長喬曉陽喺四月發表政改方案當日，都表明一七、二○年呢個時間表嘅「權威性和法律效力毋庸置疑」。可能孫公心知講錯咗，所以事後被追問時強調佢唔係咁講，仲話佢嘅意思係今次政改被否決嘅話，根據循序漸進原則，下次要由頭開始再起步，總之要普選難度好大啦！佢呢番話，真係令人愈聽愈糊塗，唔知佢想講乜。

期間，東華三院馬振玉紀念中學校長周應泰問起，點解特區政府用「起錨」兩字，而唔用「起航」、「啟航」呢啲較接近書面語嘅口號，孫公即時劃清界線話，呢個口號係負責公關嘅同事度出嚟，佢無份參與，但估計可能「起錨」同英文版「Act now」音似意思又似，而且香港係一個島，四面環海，畀人同坐一條船嘅感覺，所以咪「起錨」、「Act now」囉！

香港島就四面環海，計埋新界九龍仲係咪四面環海就值得商榷啦！話時話，孫公喺回歸初期都做過政制事務局局長，對政改問題應該瞭如指掌，只因佢太坦白，連暫時唔應該講嘅嘢都講埋，亦唔係好願意蹚渾水，所以先至搞到甩轆，歸根究柢咪又係煲呔曾搞嘅「起錨」騷惡搞囉！