中環出更：超雲揀性感熱褲晒長腿

呢排天氣悶熱，係時候出動熱褲，等雙腿涼快吓。超雲都加入熱褲行列，月初一個星期二下午，卓妮撞見佢同友人喺中環ifc四出搜尋熱褲。超雲行街都着上六吋紅色高跟鞋，下襯花花短褲，修長美腿盡現眼前。

行行吓，超雲被ZARA嘅櫥窗吸引，打量十幾秒後就直入店內尋寶。嗰陣係放工時間，店內人頭湧湧，超雲唔理咁多，照揀可也！無耐佢睇中一條淺藍色碎花熱褲，就興奮地走近鏡前比併吓。友人催促佢入更衣室試吓，超雲擰頭話唔使，似乎對自己眼光信心十足，臨畀錢前，再揀多一條卡其色七分褲再去畀錢。

孭住ＬＶ新袋嘅超雲（右），畀ZARA櫥窗吸引。 （陳嘉順攝）

超雲揀中兩條新款熱褲，其中呢條盛惠二百九十九元。

唔係着畀男友睇

收銀櫃位前人龍唔短，但超雲好守規矩，照跟隊尾，果然有家教。ZARA品牌近年人氣急升，連「最美麗港姐」朱玲玲都去掃皮褸。「社運新星」陳巧文就畀卓妮撞過去ZARA搶購減價長褸。

出擊ZARA成功，超雲嫌未夠喉，行出門口後上多兩層去名店Juicy Couture再揀過。美國品牌Juicy Couture設計走俏麗甜美風格，唔少明星都係擁躉。

揀咗一輪後，超雲滿載而歸。卓妮上前同佢say hi，問佢係咪專登買性感熱褲畀男友一個驚喜，超雲笑住擰頭話：「我平時都有買開衫，但唔係買嚟着畀男友睇嘅。」

卓妮