政情：陳岳鵬幫政府倒米
煲呔曾唔理外界批評，樂此不疲繼續搞其「起錨騷」，點知上個月先至入特首辦做特別助理嘅匯賢智庫前區議員陳岳鵬（Ronald），唔單止唔幫煲呔曾補鑊，仲要踩多兩腳。Ronald尋日同勞工及福利局局長政治助理莫宜端一齊上電台節目解構「起錨騷」，原意當然係為煲呔曾護航，但Ronald開口夾着脷，主持叫佢示範叫「起錨」口號，佢顯得不情不願，叫咗一聲就收口，仲話唔好晨早流流嚇親聽眾，不知情者真係以為佢喺度寸緊煲呔曾落區嚇親人！
一時口快講錯都算，其後講到前晚煲呔曾喺facebook反擊激進反政改人士嘅表現，但就冇更新網誌，係咪身為特別助理嘅佢做漏嘢，Ronald竟然話睇煲呔曾網誌嘅人一定少過睇facebook，即係踩緊煲呔曾網誌冇人睇。雖然佢即刻補飛話依家政府諗住主攻facebook做推廣政改嘅平台，但都無補於事。睇嚟Ronald都要諗定點返去同煲呔曾請罪嘞！