政情：華叔熟讀兵法學做人
近期一直同癌症搏鬥緊嘅民主黨元老司徒華，尋日為一個香港書獎出任頒獎嘉賓。華叔文學根基深厚，佢話自己習慣同一時間睇兩本書，分別係文言同語體文，依家就睇緊《找尋真實的蔣介石——蔣介石日記解讀》，同埋明朝嘅《草廬經略》。
華叔話，《蔣》書揭露咗好多蔣介石鮮為人知嘅往事，即使內容未必完全真實，但「盡信書不如無書」，本書仍然值得推介。至於《草廬經略》則為一本明朝兵法書，教人調兵遣將、培養士兵。華叔坦言自己唔想打仗，但熟讀呢本書可以學到唔少道理，因為人生有時都幾似戰爭咁話喎！
同場仲有康文署署長馮程淑儀同全國人大常委范徐麗泰。范太勸年輕人要了解祖國，推薦兩本介紹國情嘅書畀八十後同九十後睇，仲保證唔會悶。至於馮程淑儀就話幾忙都好，一定抽時間睇親子書籍，每晚陪囡囡睇古仔書。問佢推介咩書畀年輕人睇，馮太笑住直認答唔上嘴，因為自己唔年輕，冇心水，反而介紹大家睇Michael Morpurgo嘅故事書，內容好啱小朋友同初中生睇喎。咁都兜得到，好嘢！