政情：郝龍斌請煲呔曾食檸檬
台北市長郝龍斌尋日旋風式訪港，重點推介十一月喺台北舉行嘅國際花卉博覽會。歷經選戰考驗先至入主台北市政府嘅郝龍斌話，今個月就會成立競選辦公室迎戰年底嘅台北市長選舉。近排煲呔曾頻頻帶隊落區推銷政改，但落得噓聲四起，呢位台灣政壇明星實有好多心得畀曾班子借鏡，可惜佢今次冇時間見煲呔曾，請煲呔曾食咗個大檸檬，反而抽時間同旅議會主席胡兆英食午餐。
郝龍斌上次訪港同煲呔曾見咗面，今次港府高層都想安排兩人共進早餐，但郝龍斌前日夜晚八點幾至飛抵香港，尋日下晝三點又趕返台北，留港時間唔夠廿個鐘，所以抽唔到時間同煲呔曾見面。郝龍斌話，如果有機會佢都樂意同煲呔曾交流吓行政經驗。被問到台北市民有得一人一票選市長，但香港人卻冇得選特首時，郝龍斌明顯唔想蹚渾水，只係話尊重香港人對自己制度嘅選擇。再追問佢對香港政改嘅睇法，佢直情話唔了解，一於封嘴不談。
早排為國家乒乓球好手喺香港猝死而疲於奔命嘅旅議會主席胡兆英現身撐場，佢話遲啲會組織旅行業者去台北踩線添！