政情：建制派起錨撐政改

郵寄單張 會議協商

經濟動力「4L」中嘅3L林健鋒、梁君彥同梁劉柔芬，尋日中午連同工商專業政改動力副召集人、資深大律師胡漢清召開記者會，開宗明義撐政改，宣布將以郵寄通函形式，向全港住戶同工商企業寄發撐政改宣傳單張，呼籲市民透過電郵、書信或電話，叫泛民議員向方案投贊成票。經濟動力唔單止以民意壓民主派，仲搞噱頭寸泛民，單張一邊印有「起錨」標誌，另一邊則用被網民惡搞嘅「超錯」圖樣，揶揄泛民若再次否決方案，就係「超錯」嘞！

政府「起錨」騷用咗九百萬元，咁經濟動力預留幾多彈藥撐政改呢？林健鋒無透露，只係話郵政署嘅郵寄通函收費透明，每封信郵費幾毫子，有數得計，寄信用咗大約一百萬元，下星期政改動力亦會喺幾份報紙登撐政改廣告，費用由工商界捐助。佢講笑話，總之一定比唔上泛民策動五區補選而浪費咗嘅一億五千萬元公帑啦！

建制派撐政改同每年嘅《歡樂滿東華》大騷一樣，有錢出錢，有力出力，專業會議無咁有米，於是出力囉。專業會議「4P」中嘅梁美芬、何鍾泰同劉秀成三個鐘頭後亦召開記者會，呼籲泛民回心轉意對方案投支持票。為免泛民「溝通派」被拉向激進一端、鐵了心反對方案，專業會議倡議舉行圓桌會議，建制派同泛民閂埋門協商一套共同接受嘅方案出來，但佢哋承認日子倉卒，難度極高，強調無論方案過唔過到，機制都應該繼續運作，為二○一七同二○二○年兩個普選辦法清除障礙。

泛民係咪咁易受氹，轉軚支持政改，相信大家心裏有數。不過，中央啱啱出完招，由「喬老爺」喬曉陽首次詮釋普選定義，經濟動力同專業會議咁快有所動作，相信呢啲只係建制派撐政改船隊嘅首航儀式，未來十日建制派類似嘅舉措肯定陸續有來！