中環出更：阿一嘆溫州客「炒」貴鮑
內地富豪急增，搶貴晒豪宅、名車、紅酒，食鮑參翅肚就更加不在話下。「鮑魚之父」楊貫一爆料，話溫州人唔單止嚟香港炒樓，仲炒貴晒啲鮑魚，以十頭鮑為例，舊年每斤叫價只係二萬蚊，如今已升至每斤三萬六千蚊。阿一珍藏嘅五頭鮑，更由十年前二萬蚊一斤，升至依家嘅五萬蚊。難怪阿一話：「以前食鮑魚好似咬魷魚，依家就係咬黃金！」
五、六頭千金難求
如果要喺阿一間「富臨飯店」歎一客五頭鮑，冇二萬元落唔到樓，但內地豪客面不改容，食之餘仲「炒」埋一份，派專人去盛產上等鮑魚嘅日本，鬥快搜羅靚鮑魚。阿一慨嘆，五、六頭鮑魚至今已是千金難求。
世界御廚級名廚八月將訪問香港，阿一係世界御廚香港區代表，一於煮最撚手嘅溏心鮑魚，讓老外大開眼界。阿一教路，煮鮑魚必用瓦煲，香味分外濃。煮鮑魚材料唔慳得，先將鮑魚用凍水浸過夜，煮時用排骨湯包墊底，鮑魚放中間，面層放上嫩雞湯包，再倒入上湯。
阿一提醒大家，炆鮑魚期間要留意上湯嘅分量，一見汁水收乾就要立即添加，炆八至九小時就收火，如是者煮足三日。食鮑魚也有技巧，用刀一鋸，鮑魚啜刀，就證明溏心夠，切鮑魚要「打長切」，比「打橫切」鮮味得多。
咁靚鮑點揀呢？最緊要係色澤金黃，鮑身腰圓肥厚，有甘香鮑味，放喺燈下照一照，鮑身滲出透亮啡紅色，就係靚溏心鮑魚嘞！
卓妮