政情：崩牙光拒再談梁展文
前房屋及規劃地政局常任秘書長梁展文○八年退休，諗住轉投新世界中國地產，掀起軒然大波，當時嘅發展局常任秘書長麥齊光直指梁展文咁做會引起「公眾觀感問題」。轉眼到麥齊光退休，人稱「崩牙光」嘅佢話，嚟緊幾年又要繼續幫政府手睇住四川重建工程，又要返大學教書，又要做義工，又要去旅行，總之有排忙。
尋日崩牙光退休前同傳媒茶敍，問番佢點睇梁展文事件，佢話要講嘅都喺立法會講晒。麥齊光打咗三十幾年政府工，有廿幾年都喺鐵路部做，一九七六年一場大雨，沖爛咗橫跨城門河火車橋，佢有份將收埋喺政府倉底嘅鐵橋攞番出嚟應急，再加上新建嘅石屎橋，六星期火速起番條新火車橋，佢仲攞番啲陳年舊相出嚟同大家分享。
講到佢「崩牙光」個「朵」，都有段古講。原來麥齊光七九年起畢架山隧道時爆石屎，被粒石屎飛中，撞崩門牙，變成崩牙光！