政情：楊家駿為台醫療代言
由台灣九家頂尖醫院同兩間旅行社組成嘅觀光醫療服務團，尋日第四年來港推廣，台灣駐港機構、中華旅行社總經理楊家駿同台北貿易中心董事總經理劉錫威齊齊撐場。楊家駿盛讚台灣體檢價廉物美，化身超級代言人，難怪服務團團長、新光醫院健康管理部總經理洪子仁笑言，待楊家駿退休後請佢做代言人！
楊家駿透露，一位香港賽馬會前主席每年都會召集香港社會名流去台灣做健康檢查，可見台灣醫療服務早有口碑。現場有三位着住超短護士服嘅靚女扮「健康天使」，楊家駿笑言佢喺台灣做檢查多年，都未見過咁辣嘅健康天使嘅！
劉錫威就話，去年兩岸開放三通，就有五千名內地客去咗醫療旅遊。佢睇好香港市場，皆因每年有七十二萬港澳遊客去台灣玩，只要作適當包裝，可以吸引注重健康又為食嘅港人。香港電腦商會主席梁定球都現身推廣會，原來佢哋同台灣電腦製造商做生意之餘，都留意到台灣新崛起嘅醫療旅遊，諗住遲啲搞個團添！