政情：胡文新唔會捱夜睇世盃
熱爆全球嘅世界盃今晚開鑼！城中波友買定啤酒、零食睇好戲。合和太子爺胡文新（Thomas）都係超級球迷，今晚將現身集團旗下嘅「九龍灣國際展貿中心」，為世界盃揭幕戰做啦啦隊。不過Thomas睇波有分寸，講明唔會捱夜搞到變熊貓眼喎。
陳振彬對南非冇好感
行政會議成員尋日喺中環一間酒店舉行午宴，Thomas都參加埋一份。講起世界盃，原來每晚有幾多場直播，Thomas都瞭如指掌。佢話自己雖然無特別捧邊隊，但預咗減少夜晚應酬睇波；至於睇邊場，就要睇每場嘅「戲碼」。梗係喇，Thomas似足爸爸胡應湘（哥頓）一樣，熱愛足球，細個都踢波，中場、後衞同龍門都做過。卓妮仲記得，哥頓為支持香港足運，曾自掏腰包請克羅地亞教練來港特訓港隊添。
卓妮轉頭喺門外撞見青年事務委員會主席陳振彬（Bunny），Bunny自爆小時候熱愛足球，因個子高大，負責守龍門。卓妮問佢會否去南非現場欣賞世界盃，佢擰頭話唔會。原來佢去過南非，所到之處都畀人上下打量，感覺麻麻哋，所以寧願留港睇電視。Bunny更有抗眼攰絕招，就係自備眼藥水，睇到眼攰時滴幾滴，即時醒神晒！