政情：大輝黃錦成識於微時
潮流天天在變，要追上潮流，錶行都要「升呢」。屹立香港錶壇多年嘅「九龍表行」，近日將西洋菜街龍頭旗艦店重新裝修，以全新形象示人！「九龍表行」董事總經理黃錦成叫齊好友到賀，立法會議員林大輝都嚟湊熱鬧。卓妮以為大輝係黃老闆熟客？原來唔係！兩人結緣於童軍至真。
黃錦成話，佢係童軍九龍地域主席，而大輝就係會長，因為經常拍檔搞地區活動，成為老友，佢更介紹埋任職I.T.教授嘅弟弟黃錦輝畀大輝識，大輝賞識對方才華，邀請埋黃錦輝做林大輝中學校董，兩人有幾老友，不言而喻。
孫秉樞賣錶度困境
卓妮轉轉話題，講吓各人第一隻錶係乜牌子。大輝扁嘴話，戴錶箍住手腕唔自在，寧願少戴。黃錦成就愛精工錶，手上嗰隻仲有段古添。原來隻錶由爸爸戴開，後來爸爸見佢長大成人，主動割愛，黃錦成非常珍惜，一直戴到今日，點都唔捨得換，相當長情。
咁啱得咁橋，同場嘅「鐘錶大王」孫秉樞，人生第一隻錶都係爸爸送贈。孫生話，當年係一九四一年，爸爸送佢去上海讀大學，臨走前送咗隻「浪琴」名錶畀佢。一年後爆發二次大戰，家人匯唔到錢畀佢，眼見盤川已用盡，孫生被迫將隻錶攞去變賣，用啲錢捱咗三個月。好彩後來聯絡上家人，孫生打工又賺到少少錢，終於度過困境。諗番起嚟，第一隻錶，真係救佢一命㗎!