鋼琴大師劉詩昆間中都有到中環置地廣場間Landmark Cafe歎茶，有次見佢帶同三個保鏢去high tea，大師即係大師，飲杯茶都架勢過人！上周四下晝四點左右，卓妮又見劉大師去飲茶，今次佢單拖上陣，仲做好榜樣排隊等入座。劉大師喺等位期間電話忽然響起，之後一邊講電話一邊入座，點知坐唔夠五分鐘，櫈仔都未坐暖嘅佢忽然彈起身，一支箭咁飆出門口，直上電梯，沿行人天橋穿越太子大廈再去附近一間酒店，之後消失得無影無蹤。劉大師一把年紀仍健步如飛，佩服佩服！
卓妮
