政情：李國英唔啱食立會飯
○八年起無再做立法會議員嘅李國英，早兩日以大埔區議員身份返咗立法會同班舊同事飯敍，遠睇差啲唔認得，事關以往外號「煲呔英」嘅佢，唔止無再戴煲呔，個人仲瘦咗又精神咗，唔做議員之後當堂容光煥發，難怪佢話立法會呢碗飯唔啱佢食。
李國英一路以為自己好健康，點知早前做身體檢查時，發現身體質量指數（ＢＭＩ）去到廿七，高過世界衞生組織建議嘅廿五肥胖標準。之前跟開醫療政策嘅佢，隨即展開減肥大計，每朝例跑四十五分鐘，遇啱得閒就再返內地打高球，結果日子有功，三、四個月就減咗十五磅，ＢＭＩ回復正常水平。
李國英就話以前做議員嘅時候，由朝開會開到晚，嚴重缺乏運動，壓力又大，應酬又多，想唔肥都幾難。雖然話做議員獲益良多，但自問呢碗飯唔啱自己食，都係做番老本行律師同區議員好啲。