政情：李文斌愛妻誕龍鳳胎
恭喜恭喜，理文造紙太子爺兼仁濟董事局副主席李文斌（Edmond）同太太何芷韻（Amanda）嘅龍鳳Ｂ尋日朝早出咗世啦。Edmond前晚就陪太太入院待產打氣。
第一次做媽咪嘅Amanda揀咗全身麻醉，所以無得第一時間望下對寶貝。佢話揀朝早生，唔係因為要擇時辰，只係就醫生嘅檔期。佢同老公都希望一對仔女幸福快樂，健健康康就夠，唔會畀壓力ＢＢ。
不過雖然係做開刀手術，但係Amanda抖咗幾個鐘就精神晒，仲親自發短訊畀班親朋好友宣布好消息。一對小寶貝分別叫Elena同Aden，分別重6.5磅同5.6磅。
依家一次過砌齊個「好」字，不過Amanda都無閂實再做媽咪之門，話等抖夠先再考慮。