政情：林D9拍拖行街冇斬獲
港府問責班子今日會再次空群而出，落區大搞第二波政改「起錨」騷，其中一名主將政制及內地事務局局長林瑞麟（林D9）喺尋日大戰前夕，抽空陪太太行街shopping兼散心，彌補今日要放棄家庭日去做騷嘅損失。不過佢哋似乎只係喺商場原地踏步，乜都買唔到就空手而回。
尋日近下午六時，我哋喺中環國金一間超市門外撞到林D9，當時佢一身便裝，連近日同佢形影不離嘅「起錨」襟章都無戴喺身，雙手插袋唔知呆等緊啲乜嘢，表情神態好似「拋咗錨」咁。不過等咗唔夠幾分鐘佢就重新「起錨」，原來係等緊去咗廁所嘅太太，之後兩公婆就手拖手搭電梯去停車場攞車走人。
林D9同太太之前喺商場睇過乜，我哋不得而知，不過見佢兩個離開名店林立嘅商場時，雙手都係空空如也，就知道佢哋冇乜斬獲。林D9今日落區做騷會唔會再一次原地踏步、空手而回，大家拭目以待啦！