政情：蔡瑩璧退休秘魯訪古
點睇都唔似已屆退休之年嘅商務及經濟發展局常任秘書長蔡瑩璧（Yvonne），預算今年十一月就到期退休，不過佢呢排仲係忙到飛起，自己都搞唔清楚實際日期，話要等公務員事務局落實喎。忙咗幾十年嘅佢，一直都好希望可以遨遊天下，所以佢一早已經計劃好未來條旅行路要點行，真係未出發先興奮。
Yvonne第一站希望可以去秘魯嘅馬丘比丘，呢個建於十五世紀嘅印加帝國古城遺迹，坐落海拔二千多米嘅山脊，可以鳥瞰烏魯班巴河谷，相信係畀古時嘅印加貴族當作鄉間修養地。遺迹早於八三年被聯合國教科文組織列為世界遺產，○七年仲獲瑞士一個基金會選為「新七大奇迹」。咁值得去嘅地方，怪唔得之Yvonne揀佢做退休後嘅第一站啦。
Yvonne係飲得之人，去南美睇完古蹟後，又想飛去法國報讀一啲有關紅酒嘅課程。佢先排因為濕疹搞到要暫時封杯，依家濕疹好番啲，可以解封，但係都唔飲得多，仲只可以飲紅酒，唔可以掂白酒。不過有得「咪」吓，都叫做好過無啦！