政情：煲呔曾又做無間道?!

不過有啲嘢錯一次可以話無知，錯兩次就唔可以扮唔知。煲呔曾政府轄下嘅食環署同警方，喺六四廿一周年前夕，接連以冇申請娛樂牌照為由，沒收支聯會嘅兩個民主女神像及相關浮雕，仲先後拉咗十幾名支聯會常委同義工，最終激發十五萬人參加前晚嘅六四燭光集會。不但支聯會主席司徒華事後公開多謝煲呔曾政治智慧低！就連建制派嘅全國人大常委范徐麗泰同行政會議成員召集人梁振英（CY），尋日都暗批煲呔曾政府幫倒忙，令「無間道論」再次不脛而走！

范太：政改廣告唔知Sell乜

范太喺電台指出，雖然當局執法係跟足法例嚟做，但係如果條法例好耐冇執行過，突然間先至用番，就難免會令好多人覺得政府係有意進行打壓。佢又話香港人向來係「你愈唔畀我做，我愈要去表達一下，呢種情況喺香港好常見」，似乎是暗批當局連咁簡單嘅民情民意都拿捏唔到。

CY出席另一場合時，亦指連警方都計到有十一萬三千人去維園，證明咗人數真係超多，唔排除市民係覺得政府同警方故意阻撓，先令佢哋出嚟表達意見。

范太除咗暗批港府處理女神像問題嘅手法，亦對於近期一連串嘅政改「起錨」爛騷不太苟同。佢話香港近年有種趨勢，乜都靠Sell（推銷），觀眾好多時睇完廣告都要問一句：「吓？Sell緊乜呀？」明寸煲呔曾嘅「起錨」騷冇深度同帶唔出想講嘅主題。

至於前周六成班問責高官落區派傳單，范太認為唔多唔少都有啲啲效，但係就指傳單起碼要有啲政改方案嘅具體內容先叫有誠意。

事實上該張「起錨」傳單，對方案嘅具體內容根本隻字不提。煲呔曾一直畀人質疑佢係港英餘孽，依家對政改同六四兩樣中央最關注嘅議題，佢都有意無意暗中幫咗對手，想唔畀人懷疑佢都幾難！