中環出更：余漢坤活化大澳不二之選
大澳水鄉雖然有「中國威尼斯」之稱，但當地嘅旅遊發展向來只係「吊鹽水」，自從信和集團旗下公司計劃將舊大澳警署活化為四星級精品酒店後，就帶來咗一線曙光。今次活化計劃由信和太子爺黃永光主打，而鄉議局主席劉皇發嘅女婿、信和總經理余漢坤（Randy）就負責籌備，據講裝修動土儀式暫定於本月十七日舉行，屆時發展局局長林鄭月娥會到場主禮。
土生土長原居民
Randy係大澳土生土長原居民，讀到小學五年級先去外國讀書，童年往事一籮籮，所以順理成章成為計劃內其中一個口述大澳歷史嘅人物。Randy為咗今次動土儀式，四出搜羅大澳地道小食，包括鹹甜茶果、大澳蓮香酒家奶皇包、寶蓮禪寺杧果糯米糍、紫貝天葵茶等，並將小食造成迷你型，方便嘉賓一啖過品嘗，不過最終菜單仲有待拍板。
發叔近年積極提攜Randy踏上從政路，Randy除咗擔任鄉議局及大澳鄉事委員會顧問，仲係離島委任區議員及發展局規劃地政科上訴審裁團成員，極受政府器重。從私人地產生意變為參與非牟利活化計劃，Randy話，雖然工作性質有好大轉變，但一樣有壓力，壓力並非如從商賺錢咁簡單，而係自己能否幫到社會，成功感實在難以形容。
卓妮