中環出更：李鋈麟開船廠圓航海夢
人人有夢想，東華三院總理李鋈麟（Alan）原來年輕時嘅夢想係做船員縱橫四海，仲特登走咗去讀輪機工程。不過同好多當年嘅年輕人一樣，佢個夢想因為媽咪反對而告吹。
依家佢做咗上市公司主席，除咗有錢買遊艇自己揸船出海，仲計劃投資億元開船廠生產遊艇，自己仲做埋設計師，一圓佢年輕時嘅航海夢。
Alan依家擁有兩艘遊艇，一艘喺兩年前金融海嘯下用三千萬元買入，全長86呎，喺意大利生產，名為Antago。另一艘就喺台灣生產、73呎長、以八百多萬元買入。依家兩艘遊艇都泊咗喺深灣，每個月唔計油錢，都要花幾萬蚊養住。
捐復康小巴予戒毒機構
Antago船面分隔咗客廳同飯廳區，相當寬敞。船艙亦設有三間房，主人房仲放咗張貴妃椅，Alan話有時攰攰哋就會落去休息吓，睇吓書同靜靜哋諗吓嘢。鍾意接近海洋嘅佢，暑假差唔多每個周末都會出海，釣魚游水燒嘢食，佢話周末度度都咁多人，出海除咗唔使同人逼，其實消費亦唔算高，非常抵玩。
Alan上個月以爸爸李恩、細佬李鋈發，仲有鳳凰慈善基金會、香港李氏宗親會同灣仔中西區工商業聯合會名義，捐咗一架復康小巴「關愛8號」畀香港戒毒會石鼓洲康復院。之後佢就出動旗下嘅兩艘遊艇，接載家人同三個團體嘅代表到石鼓洲作實地探訪。
原來今次只係Alan第二次到訪石鼓洲，佢話上次有朋友喺山上參觀時不適暈倒，但島上並無可以接載病人嘅車輛，結果要用帆布床抬落山又危險又唔方便。有見及此，Alan即時扑錘送贈一架可以放得落帆布床嘅小巴畀佢哋。
石鼓洲嘅院友都係自願戒毒人士，島上義工亦由已經成功嘅戒毒院友擔任。其中曾經沉淪毒海嘅輝仔，依家唔單止重過新生，仲攞緊獎學金讀大學，令Alan非常感動。
卓妮