政情：唐偉章遊美睇怪石
唐偉章由美國返港做理大校長，唔經唔覺有年幾。校長勤於校務，一直唔敢遠行。今年終於可以抖抖，打算同唐太拍拖遊覽被譽為美國風景最美嘅Sedona，嗰度地質特殊，奇山怪石林立，校長話要盡情行山、踩單車，充吓電喎。
唐校長尋日去中國會食晏，見佢容光煥發，原來佢同唔少學生哥一樣，等住放開心暑期。呢趟揀去位於美國阿利桑那州嘅Sedona，當地有個著名國家公園，滿布巨型岩石，遊客置身當中，恍如走進雕塑館，加上土壤含氧化鐵，岩石呈現亮麗紅棕色，喺斜陽照射下，用傻瓜機都拍得出明信片質素，真係諗起都興奮。
但校長唔係顧住玩嘅，腦袋時時刻刻諗計「撲水」。佢預告理大六月有個粵劇籌款，搵嚟粵劇大老倌喺新光戲院上演好戲。唐校長雖然有「理大秋官」之稱，可惜佢係讀番書出身，唔識做大戲，唔會粉墨登場。