時下侵權情況好猖獗，幾乎係無日無之，好多人都唔尊重知識產權。立法會補選九龍西選區候選人白韻琹早前就不問自取，公然將版權屬於東方報業集團旗下ontv所有嘅一個片段，喺旺角鬧市播放，打擊佢同區嘅選舉對手黃毓民，搞到黃毓民向選舉管理委員會投訴，呢件事睇嚟都會有手尾跟。
喺嚟緊嘅立法會補選投票日，九龍西候選人最多，戰況最激烈。決戰前夕，白姐姐上星期五喺旺角朗豪坊嘅大電視播放ontv片段，內容係月前毓民喺立法會議事廳同金勞詹詹培忠爆粗嗌交嘅過程，白姐姐仲好揼本，喺女人街、銀行中心同旺角火車站對出嘅電視都播放呢段宣傳片，競選單張用埋毓民張相，擺明衝着佢而來。毓民憤而向選管會投訴，指白姐姐未問過ontv就播放片段，涉嫌侵權，又投訴白姐姐擅自使用佢嘅肖像，仲話等選管會調查完畢後，先決定係咪起訴白姐姐。
問番白姐姐點解不問自取，喺公眾場合播放ontv嘅片段，佢就聲稱事前完全唔知情，只係工作人員喺YouTube睇到後攞嚟用，仲話用之前問過律師意見喎。至於毓民嘅投訴，佢就話之你啦。白姐姐選唔選到仲好難講，不過，毓民一定唔會輕易放過佢，睇怕選舉過後佢有排煩。九西選區嘅候選人仲有林依麗、張錦雄、黃永志、郭兆明、佘繼泉及蔣世昌。