政情：自由黨懸紅追緝爆粗真兇
維園問候人阿媽事件升級，被指爆粗鬧人嘅自由黨，尋日開記招還擊，話要懸紅五千蚊緝拿當日爆粗真兇。自由黨主席劉健儀（Miriam）更呼冤話，翻查錄影帶後，無發現有黨員講粗口，感覺畀人抹黑，食咗隻死貓。
重賞五千蚊
自由黨港島支部主席邵家輝尋日聯同四位當日有份出席論壇嘅黨友開記招，聲言如果有市民或傳媒能夠提供確實證據，指明當日自由黨邊位成員爆粗，就重賞五千蚊。佢哋大膽呼冤有原因，邵家輝話，逐格翻睇當日各大傳媒及網上有關片段，睇唔見有黨員爆粗，反而發現坐喺論壇後面有位男士，以粗口問候自由黨；佢唔確定對方屬邊個陣營，但肯定唔係自由黨員喎。
身為黨主席嘅Miriam亦講明，若查出有黨員爆粗咁失禮，必定大義滅親，踢對方出黨。計我哋話齋，講粗口問候人固然唔啱，但若然有人「老屈」，一樣唔係正人君子。究竟重賞之下係咪能搵到真相，咁就要睇事態發展至知喇！