政情：功能連環炮 泛民難招架

自從四月二○一二年政改方案出爐，功能組別成為泛民箭靶，被打成政治特權階級，除之而後快。功能組別議員一直負隅頑抗，每次都被動接招，三十位議員又無隊形，可以話被泛民㩒住嚟打。不過，尋日嘅政改小組會，形勢同平日雲泥之別，功能組別議員全程紮駐重兵，人多勢眾，泛民直選議員則小貓三、四隻，人丁單薄，輸人又輸陣。

林健鋒批慘被妖魔化

平日呢類關於政改嘅會議，都由泛民控制大局，但尋日幾乎大部分時間由建制派嘅功能組別議員主導場面，等泛民嘅李永達同吳靄儀鬧咗幾句功能組別選民基礎窄、手握一百幾票就可自動當選之後，即刻借勢連環發炮還擊，打頭陣嘅仲係平日不問政事嘅漁農界黃容根。根哥勞氣反擊，話菜、禽、畜都關佢事，連漁民喺境外海域出事，佢都要理埋，問泛民你估功能組別議員易做呀？

根哥講完，其他功能組別議員好似玩八百米四人接力賽咁，廠商會代表林大輝、總商會代表林健鋒、工程界何鍾泰同航運及交通界劉健儀排住隊開炮。早前希臘財困令全球經濟陰霾滿布，林健鋒洞悉先機，預告歐盟唔會對希臘見死不救，完全估中晒，佢話，證明功能組別議員一樣好勤力做功課，佢尋日喺小組會上批評泛民妖魔化功能組別議員，別有用心，不如大家集中精力搞好經濟啦。

劉健儀則乘機伸冤訴苦，話功能組別選民基礎窄，你估佢想㗎？航運界選民唔多過二百個，佢多次要求當局擴大選民基礎，但政府次次畀檸檬佢食，搞到議會嘅泛民同僚譏笑佢，外間嘅人侮辱佢，令佢好氣憤。劉健儀仲即場扭政制及內地事務局局長林瑞麟嘅計，問話：「可唔可以畀番少少尊嚴我？」公開爭取為航運界加選民，搞到林D9都唔知點回應。

泛民議員要求取消功能組別，本來只係例行公事，一班功能組別議員竟然咁大反應，仲人強馬壯集體還擊，睇嚟功能組別議員呢場防守戰仲有後着！