中環出更二：王仁曼設計首飾唔怕撞款
桃李滿門嘅著名芭蕾舞學校校長王仁曼，向來畀人雍容華貴嘅形象，不過原來王校長除咗買名牌之外，仲鍾意自己做埋設計師，但唔係做衫，係設計珠寶。早前王校長出席Dior活動，就戴住自家設計嘅首飾去撐場。王校長話最怕買首飾同人撞款，自己設計可以特別啲，想點整都得。
無意推出發售
咁多種材料中，佢最鍾意珍珠，清雅脫俗，所以買到靚珍珠都會自己設計。至於其他銀器寶石，王校長都一樣會用，只要靈感到，一樣可以變成佢嘅佳作，好似嗰日佢出席活動所戴住嘅首飾，就全部都係自家作品。
嚟緊校長有排忙，事關今年係佢哋王仁曼芭蕾舞學校創校五十周年，嚟緊會喺文化中心搞一個名為《舞想成真》嘅大型匯演，到時好多舊生會返嚟表演同捧場。講返Dior，榮升做嫲嫲嘅校長，買嘢都會諗埋個孫女，佢話之前去歐洲睇騷，見到Dior嘅童裝好靚，可惜當時趕時間，唔得閒幫孫女掃貨，明年再去歐洲，佢話實會買衫畀孫女。