中環出更一：范鴻齡拍住太座歎平民早餐
曾經係「公職王」嘅前中信泰富董事總經理范鴻齡（Henry），自從公司炒燶外匯後辭晒所有公職，又離開工作多年嘅中信泰富，依家好少喺社交場合蒲頭。「無官一身輕」，Henry退休後全職同太太拍拖，過着優哉游哉嘅生活。卓妮早幾日仲撞到佢返教會前，同太太去北角七姊妹道嘅群記餐廳，歎番個平、靚、正早餐添。
當日係星期日早上九點幾，卓妮見到Henry一身便服，同太太及朋友一行五人去群記餐廳歎早餐，之後佢負責埋單。本身係基督徒嘅Henry同卓妮講，佢嘅教會喺英皇道，所以每個星期返教會前，都會貪就腳去群記歎番個早餐醫肚。佢大讚群記班伙記招呼周到，出品又新鮮，早餐首推火腿通粉同鮮油多。
忙家族慈善業務
咁耐冇見Henry，卓妮梗係好關心佢嘅動向啦。Henry話，呢排都係忙緊家族嘅慈善業務，但對於中信泰富前主席榮智健有意自己出嚟搞生意嘅傳聞，Henry就三緘其口，唔肯評論嘞。
Henry當年仲係「公職王」時，日日都着住件老西示人，仲要成日出席無數飯局，應酬費肯定唔少，但佢嗰日食嘅早餐，只不過盛惠十七蚊，平民過唔平民。
Henry退休之後，甘於平淡同太太輕輕鬆鬆咁過日子，唔會介意着得輕便啲去茶餐廳歎平民美食，都咪話唔難得！
記得Henry講過，佢深受母親兩個教誨影響，一個係「吃虧即是佔便宜」；另一個係「人像千層餅」，即係人與人嘅關係好似千層餅，你疊我、我疊你，冇話邊個高啲、邊個低啲，所以咪以為自己處境好差，亦毋須羨慕別人，只要腳踏實地，處之泰然，有呢種心態就唔會急功近利。依家Henry過緊咁悠閒嘅生活，唔知係咪受母親影響呢？