政情：陳家強勤做GYM保身形
高官日忙夜忙，應酬多，唔操Fit身體，好快做殘。財經事務及庫務局局長陳家強有套強身妙法，就係一星期做三次ＧＹＭ，每次行半小時至四十五分鐘，一邊急步行跑步機練氣，一邊睇新聞，一舉兩得！
一個星期三黃昏時段行經香港會，撞正陳家強行出嚟，以為佢食完飯，原來健完身至真。陳家強喺香港會做ＧＹＭ多年，非常有規律，事關佢每星期總有三幾晚要應酬，所以佢會把握放工後、應酬前一個小空檔，急步行跑步機，練吓氣又可以踢走肥肉，應酬都醒神啲，通常每星期做三、四日。日子有功，步入中年嘅佢依然肌肉結實，Fit過唔少後生仔。
陳家強做完ＧＹＭ後換番套西裝，匆匆趕下場，去邊呢？原來美國芝加哥大學校長遠道來港，芝大嘅商學院名聞世界，陳家強身為芝加哥大學工商管理碩士及財務系哲學博士，與芝大淵源好深，太太陳胡翠萍都係芝大校友，大仔同細仔亦都喺芝大讀書，校長一場嚟到，梗係去撐吓場喇。