政情：孔丹撐復建居屋紓解民困
香港樓價貴到飛起，市民要求復建居屋嘅呼聲愈嚟愈大，恒生女大班梁高美懿都叫大家唔好買樓住，連北京中信集團董事長孔丹都出到聲，話港府應該學內地政府調控樓市嘅手段，以賣地收入去起多啲廉價房屋，幫輕小市民嘅買樓壓力。
孔丹尋日專程來港，主持旗下中信嘉華銀行改名為「中信銀行國際」嘅盛事，佢掌舵嘅中信集團總資產達21,000億元人民幣，係不折不扣嘅大國企。中信集團係港人熟悉嘅中信泰富大股東，兩年前中信泰富炒燶澳元勁蝕一百五十幾億元，全靠集團接手爛攤子先至渡過難關。
我哋尋日同孔丹傾起香港樓價問題，佢話內地樓市依家正在大調整，政府用嘅辦法就係以賣地收入去起廉租屋、經濟限價房等四種廉價屋。佢話香港有興建居屋嘅經驗，相信港府有能力去解決呢個問題，但係如果唔因應情況變化而復建居屋，問題都好難解決。
鄭海泉睇唔過眼
今年三月對香港高樓價提出警告、又主張復建居屋嘅滙豐中國董事長鄭海泉，對於港府遲遲唔做嘢就更加冇眼睇。尋日我哋喺中信銀行國際嘅酒會見到佢，問佢依家年輕人買唔買樓好，點知佢好勞氣咁連講幾次：「買唔起！」我哋問佢嘅意思係後生仔買唔起定係佢買唔起？佢都係重複嗰句：「買唔起！」卒之佢終於肯講，依家香港啲樓價咁高邊個買得起，仲話佢自己有樓都係咁話。