中環出更（一）：陳振彬悠閒Look輕鬆莊重
名人都有輕鬆悠閒一面，日日着筆挺西裝，難免有啲悶。青年事務委員會主席陳振彬（Bunny）上周六出席柴灣青年廣場嘅「青年交流會」，同市民傾吓香港足球發展，就以Smart Casual示人。
Bunny熱捧「潮人」至愛嘅Banana Republic同Abercrombie & Fitch（A & F）， 皆因呢兩個品牌，佢都有份生產。
阿根廷買抵着羊皮鞋
美國品牌Banana Republic嘅西裝以用料靚、剪裁合身見稱，Bunny就鍾意其設計夠低調，唔會將品牌名外露咁招搖，呢日Bunny放棄自己日日着嘅中山裝，揀咗件灰綠色西裝，配襯A&F綠色拼粉紅色格仔恤衫，形象即時Young晒，下身襯埋同樣係美國品牌嘅L.L.Bean休閒褲，輕鬆得來不失莊重。呢三個名牌同Bunny好有緣，統統係佢有份製造嘅產品，實行肥水不流別人田。
不過講到買鞋，就要幫襯其他人嘞。Bunny腳上嗰對，就係出自阿根廷設計師手筆，係新年去南美旅行嘅戰利品，雖然唔係名牌貨，但用料係羊仔皮，着上腳後舒服到唔捨得除，Bunny一口氣買咗米色同白色，每對只係二百幾蚊港紙，認真執到寶！
卓妮