政情：胡經昌嘆無錢買金
希臘債務危機火燒連環船，搞到歐元都起勢咁跌，但最弔詭嘅係連一向最穩陣嘅金價都畀佢拖累埋。我哋日前喺香港友好協進會嘅活動上，撞到有「金王」之稱嘅中華總商會永遠榮譽會長胡經昌，即刻把握機會請教吓佢點解啲金價會無端端跌，點知金王話佢自己都唔明，仲話覺得呢件事好唔尋常喎！
胡經昌話，喺兩年前、即係金融海嘯爆煲之後，好多投資者都對金融體系冇晒信心，導致大筆資金最後流咗去黃金市場，喺大家不斷炒賣底下，金價理應只會愈升愈高，唔會跌先係。點知近日金價掉頭下跌，胡經昌都對呢個現象感到莫名其妙，仲忽然慨嘆話，即使依家啲金平咗都冇錢入貨喎。金王都冇錢買金，唔係啩？
原來胡經昌都係前年金融海嘯嘅受害人之一。佢搖晒頭咁自爆，話自己嘅資產一度畀海嘯捲走近七成，依家雖然回咗啲本，冇當時咁傷，但仲未返番去海嘯之前嘅水平喎。曾經跌到咁金，難怪金王依家買舊金都咁小心啦！