政情:孫公團體馬敲勝鼓

保良局嘅新舊主席總理,做善事夠晒合拍,私底下仲老友鬼鬼,齊齊夾錢買馬做馬主。呢個名為「保赤安良團體」,成員有今屆保良局主席呂鈞堯以及劉陳小寶、鄭錦鐘……仲有教育局局長孫明揚,總共十七人。

佢哋隻愛駒「得到寶」買咗無耐,本周三第二次落場就拉頭馬,贏咗六十六萬獎金,扣除練馬師、騎師同馬房嘅獎金,實收四十六萬,連埋首次勝出頭馬嘅四十萬獎金,總共為團體帶嚟八十六萬元進帳,不過佢哋會先捐十萬畀保良局,餘下用番喺「得到寶」身上。

保良局副主席鄭錦鐘話,今次係佢哋第二次夾份買馬,之前養過隻「良友之寶」,依家退咗役,雖然都拉過頭馬,但埋單蝕成三百萬元,所以即使拉頭馬,都無獎金「回饋」馬主食餐飯,難怪年前為「良友之寶」首次入馬場嘅孫太,都話希望「得到寶」依家贏咗,可以有餐食吓。

講開「良友之寶」,除咗蝕錢外,當年仲搞到孫公惹是非,當時仲係房屋及規劃地政局局長嘅孫公做保良局總理,同其餘十六位總理組成「保赤安良團體」買馬,點知惹爭議,但孫公認為無利益衝突,繼續同大家夾份買「得到寶」,今次都有份贏頭馬。