政情：希臘危機港股瀉肥亨叫淡定
希臘債務危機愈滾愈大，該國政府企圖推行嘅財政緊縮政策又遭國民激烈反對，觸發環球股市全面下跌。歐洲各國人人自危，但同佢哋隔咗個大西洋嘅一眾本港政商界名人，就似乎驚都未驚過嘞。貴為港大經濟金融學院榮譽教授嘅中策集團主席馬時亨更大派定心丸，相信今次歐洲金融危機唔會對香港造成太大影響，仲話咁樣反而可以確保息口唔會升住喎！
陳健波話長遠有利
呢幾日香港股市係咁跌，搞到市民心慌慌，尋日撞到馬教授，佢好淡定咁話，依家希臘國民對政府收緊銀根嘅政策咁抗拒，令國際貨幣基金（IMF）對出手相救有啲卻步，但大家都唔使咁悲觀喎，何解？馬教授話：「因為歐洲各國都係坐埋同一條船，如果呢個問題愈發愈大，佢哋一定會出手啦，唔幫希臘盞影響自己啫！」
立法會保險界議員陳健波仲樂觀，話今次危機長遠嚟講可能有利香港添，波哥話：「歐洲嘅資金都要搵出路㗎，中國同香港嘅經濟咁穩定，啲資金分分鐘流過嚟避難！」波哥仲揚言自己會趁低吸納，不過就話個市仍然會好波動，提醒大家唔好亂借錢作短線投資喎。
不過會計界議員陳茂波就唔係咁睇嘞，佢話如果希臘國民今次唔肯同政府一齊承擔痛苦，擔心會有連鎖反應，影響埋其他歐洲國家，仲話該國嘅評級機構都要就今次危機負責，事關佢哋應該睇實希臘嘅財政狀況，一早向投資者發出預警喎，好彩陳茂波話自己冇投資歐元，只係兌過啲歐元去旅行咁啫。
