政情：IQ博士掌立會最佳人選

今次二○一二年政改方案，港府只要拉到四名泛民轉軚已經夠票通過，但煲呔曾至今都未湊夠數，惟有重施故技，期望現任立會主席辭職投票。不過呢吓奇招要耍得成功，最重要係接任嘅新主席亦要甘願背上破壞立會傳統嘅罪名，夠膽一邊主持會議、一邊投票支持政改，否則港府最後又會少咗一票。呢位人選除咗要唔怕面懵同畀人鬧之外，仲要冇爭取連任嘅選票壓力，更加要中央同港府信得過，絕對唔易搵！

傳下屆棄選冇包袱

根據立法會有關規定，現任主席辭職後會先由內務委員會主席劉健儀（Miriam）暫代職務，並最遲喺主席出缺後第三次立法會大會內舉行主席補選，具體日期則由代主席決定。Miriam係其中一名最資深嘅議員，對《議事規則》嘅熟悉程度同主持會議嘅經驗，隨時多過現主席，絕對有資格同能力坐正。之不過律師出身同身兼自由黨主席嘅佢，亦出晒名重視守規矩，同樣好重視市民嘅睇法，估計一旦主席有出缺，佢會有咁快得咁快舉行主席補選，將呢隻千古罪人黑鑊卸畀其他建制派議員。

到底建制派內邊個係最佳人選呢？有人就推舉外號「IQ博士」嘅中總代表黃宜弘，一來以佢嘅背景同往績，中央同港府對佢絕對係百分百信任；二來外界早已盛傳佢來屆會棄選退休，即使真係再選，相信中總班選民都唔會因為佢破例投票撐政改而唔支持佢，相反可能有助佢爭取連任添！至於面懵嘅問題，「IQ博士」幾乎每年都畀人批評為立會大懶蟲，仲爆過轟動一時嘅「中指」事件，但佢依然面不改容，真正做到視民望如浮雲。

我哋問「IQ博士」係咪會有人搵佢頂現任立會主席個位，佢首先「哈哈哈」大笑咗約六秒鐘，然後話：「呢個係假設性問題，我係唔會答嘅！」冇講明係咪一定唔參選。問佢覺得參選新主席嘅議員，應否喺競選時講明會投票，佢又話：「無論我點答，其中一邊都會有人鬧我，咁又何苦呢？」

兩個答案都畀人無限嘅想像空間，睇嚟坊間傳聞都係空穴來風必有因。