中環出更：政商捧場 女拔晚宴籌千萬

女拔萃上月為佐敦道校舍重建舉行奠基儀式，為前晚籌款晚宴起了重要宣傳作用，撐場嘅舊生包括運輸及房屋局局長鄭汝樺（Eva）、新鴻基地產董事郭炳湘太太李天穎（Wendy）、前行政會議成員范鴻齡（Henry）太太、籌委會主席丁午壽太太等，立法會議員方剛就因為女兒讀過女拔萃，特登去捧場，順便撐埋黨友丁午壽。咁多校友撐場，證明女拔萃教出嚟嘅學生都係飲水思源，出錢又出力。

除咗女拔萃舊生捧場外，好多有心人都有到場支持，好似教育局局長孫明揚與太太鍾小芬、港大校長徐立之夫婦、Henry妹妹前廉政專員羅范椒芬、合和實業主席胡應湘夫婦、前建築師學會會長呂元祥夫婦同Adrian等。

Adrian話係應好友邀請出席晚宴，但就無透露有冇捐錢，Adrian新婚無耐，仲未有傳出佢做爸爸嘅消息，莫非咁快就已經諗定仔女嘅讀書大計？

胡應湘夫婦同女拔萃無乜關係，但就好支持女拔萃辦學風格。

鄭志剛獲好友邀請出席籌款晚宴，佢左手戴住一串佛珠，莫非信咗佛？

莫文蔚壓軸演出

籌款晚宴節目內容豐富，包括中小學生表演音樂及舞蹈，而作為舊生嘅藝人莫文蔚就作壓軸演出，加上拍賣環節，據聞最後晚宴籌得逾一千萬元，淨收益將全數撥入「卓育菁莪」籌款計劃，款項將用作重建校舍、提供多元化課程、增加獎學金及學生津貼等用途，新校舍預計於二○一一年秋季竣工。

何超鳳（右）孖住平時甚少曝光、讀緊女拔萃嘅女兒，齊齊現身晚宴。（女拔萃提供圖片）	范鴻齡（右一）與太太（右二）及妹妹羅范椒芬（左二）一齊出席女拔萃籌款晚宴。	女拔萃喺灣仔會展筵開二百二十席，逾二千五百人出席，盛況空前。

卓妮