政情：Tim霍踢波憶亡父
尋日香港專業聯盟就同一隊本地球隊嚟咗場友誼波，立法會體育界代表霍震霆（Tim）都有嚟，佢完咗場後，仲落草地同班正在訓練嘅小朋友踢番幾腳。Tim同已故父親、全國政協副主席霍英東一樣咁熱愛足球，佢話有次爸爸出席球賽球癮發作，叫佢負責頒獎，改為自己落場，霍老仲同佢講，事業無論幾成功，都唔及球王比利射入關鍵一球帶畀全國嘅歡樂。
Tim話最近立法會同僚張文光送咗張報道張文同霍老鬥波嘅剪報畀佢。張文同我哋講，有一次南華足球隊同由立法會及臨時巿政局議員組成足委會代表隊打咗場友誼波，當時霍老以南華足委隊中鋒迎戰，敵方就有張文。張文記得，當時佢嗰隊嘅隊長吩咐如果負責mark霍老就要因住，千祈唔好整親老人家，張文依足指引，自言打咗一場「假波」。點知一張霍老啱啱超前張文嘅相翌日大大張登咗喺一份報紙上，張文畀霍老超前呢一刻，成為咗歷史。張文到尋日仲呻笨，話唔知張相會唔會放喺霍家籌備中嘅霍英東博物館。