政情：陳振彬5.16泰國巡廠

兩星期後就到立法會補選投票日，建制派多數選擇離開香港費事眼冤，有政黨搞澳門遊，有社團就搞高鐵團，但有人確係撞正當日出外公幹。從事製衣生意嘅青年事務委員會主席陳振彬（Bunny）亦身兼觀塘區議會主席，佢話十六日投票當日可能身在泰國，泰國咁亂，當然唔係去玩啦，而係巡視當地嘅製衣廠房，所以未必可以去投票。

Bunny喺泰國間廠房約有一千員工，規模已較高峰期三千員工大縮水，主要因為近年泰國局勢動盪不穩，製衣定單大幅減少，廠房規模自然要縮水，所以佢語重心長話，社會要謀發展，一定要講和諧、講穩定，亂晒龍只會嚇走投資者。Bunny又講開十八區議會正、副主席將會喺下月四日出發到上海參觀世博，雖然開幕發生混亂，但相信經過一個月時間磨合後會運作暢順。

本身係委任區議員嘅Bunny尋日同三個區議員喺區內開服務處，不過佢話係為咗服務市民，千祈唔好誤會佢嘅舉動係要部署參加直選喎。