條片見到兩名女人喺鵝頸橋打小人，其中一個拎住隻高踭鞋係咁打，個小人身上就寫住「惡晒高層」，負責打小人嘅仲一邊口噏噏鬧管理層推行新調更制剝削員工，成日廢噏搵藉口，下一次又唔知出咩新招，所以要先下手為強，另一個就一唱一和咁話，打小人係無用嘅，上次八百幾人圍城公司就怕咗佢哋，公司最驚佢哋團結，所以呼籲員工一定要參加ＡＭＧ咁話。
工會總幹事曾國豐就話，係有條咁嘅片擺咗上YouTube呼籲員工參加ＡＭＧ，但就話未定議程傾乜，要睇埋下個星期二同管理層開會傾成點先。
國泰發言人就話，條短片入面並無提及國泰字眼，又唔可以證明到片入面嗰兩個女人係咪國泰員工，所以無得回應喎。