政情：李小鵬拍拖英語談情
金牌運動員個個都值千金，就算退咗役，一樣受到品牌歡迎，尋日世界體操冠軍李小鵬同○八年奧運體操個人全能金牌得主楊威，就獲瑞士品牌IWC送贈四萬蚊名錶。
依家喺美國讀緊英文嘅小鵬，今次同楊威嚟香港，主要係為咗出席慈善表演。小鵬已經去咗美國半年，尋日同品牌高層用英語交談講得頭頭是道，不過小鵬就好謙咁話，聽同講係可以，但寫同睇就要花多少少時間，佢仲話一完成表演之後就要即刻返美國考試。佢擔心今次缺咗幾堂課，返去要搵老師補課先得。
楊威話做爸爸好辛苦
小鵬同女朋友李安琦兩個一齊喺美國讀書，平時都係用英文溝通，就算談情都用英文，難怪小鵬英文進步神速啦。小鵬又話如果有機會，都想好似師兄李寧咁做生意，不過就要先讀經濟同管理學充實下自己先。
至於結咗婚年幾嘅楊威，已經做咗爸爸，有個五個月大嘅仔仔，佢話做爸爸好辛苦，又要滿足BB嘅要求，又要了解佢有咩需要。講係咁講，楊威講開平時要落手落腳幫仔仔換片片時笑到見牙唔見眼，就知佢幾享受湊仔樂啦﹗