政情：陳詠梅劈炮入境處震盪

五十五歲嘅白韞六，按舊制將於今年底退休，就算政府基於接任部署安排，延任佢坐多一年半載，估計白韞六最遲下年亦要全身而退，處內一連串高層接班部署勢所難免。入境處「一哥」嘅接班人選，以副處長陳國基呼聲最高，而任職入境處廿八年、由助理入境事務主任一步步爬至首長級官階嘅陳詠梅，本來被傳係接替陳國基成為副處長嘅大熱，有望成為本港首位入境處「二姐」，依家突然遞大信封，事件被認為相當不尋常。

鍾林慧行情看漲

陳詠梅係回歸後首位出任入境處助理處長嘅女高官，其搏到盡嘅工作表現，深受前上司李少光同黎棟國賞識，前途一片光明，仲曾經接受傳媒訪問，自言閒來喜以書法繪畫同彈古琴減壓，可算入境處明日之星，所以，佢嘅呈辭消息相當突然，一下子傳遍處內中高層，引起部門震盪。入境處上年出現大地震，被指處理蘇錦樑卡片事件同泰國包機風波表現欠佳嘅副處長趙偉佳，突然放長假，燉冬菇之說甚囂塵上，現時又失一位助理處長，令處內高層嘅接班部署進一步被打亂，真係屋漏兼逢連夜雨。

趙偉佳衰乜嘢有迹可尋，但陳詠梅突然呈辭，處內至今未有一個確實嘅說法，據內部揣測，陳詠梅求去，應該唔會係希望多啲時間弄琴畫畫，怡情養性咁簡單，可能同入境處內一幕「二姐」寶座之爭有關。副處長一職，涉及隔代入境處「一哥」嘅戰略部署，政府內部到呢一刻好大機會已敲定人選，估計有人赫然發現新娘不是我，於是毅然放棄高薪厚祿，遞信求去咁話。如果呢個猜測係真嘅話，呢套入境處《宮心計》劇情應該好精彩。

有人辭官歸故里，有人漏夜趕科場，陳詠梅求去，入境處內另一位當紮女官、助理處長鍾林慧，升任副處長嘅行情迅速看漲，而同係助理處長嘅周康道亦被睇好，鹿死誰手，相信好快會有消息傳出。