中環耳目：金刀梁夫婦愛Cafe Landmark招牌菜
龍蝦係好多老饕心目中嘅美味佳餚，連安老事務委員會主席「金刀梁」梁智鴻醫生都抗拒不了。佢經常同梁太去置地廣場嘅Cafe Landmark醫肚，至愛招牌菜式白汁龍蝦意粉。
城中名人蒲點
梁太話畀卓妮聽，金刀梁平時喺中建大廈返工，幫襯Cafe Landmark係貪佢就腳，同埋啲嘢好食。佢哋至愛嘅係白汁龍蝦意粉，喜歡佢夠乾身，而且佢哋用大半隻波士頓龍蝦上碟，勁新鮮好味。
Cafe Landmark喺置地廣場二樓嘅中心位置，係置地廣場一個好當眼嘅大露台，的確係夠晒就腳，佢屬於美心集團，已經開咗廿年，至今依然係城中名人嘅熱門蒲點。尤其係下午茶時間，一眾明星名太都鍾意喺度消磨。佢哋有幾味歷久不衰嘅人氣菜式，例如法式芝士焗蟹蓋，同埋白汁龍蝦意粉，深受食客歡迎。佢哋嘅經理話畀卓妮聽，白汁龍蝦意粉幾乎由餐廳開幕之後就熱賣至今，係最知名嘅招牌菜嚟㗎！
卓妮