中環出更：蔡太貪ISSEY MIYAKE皺褶衫方便
女人衣櫃總係琳琅滿目，但講到出差或去旅行，唔會皺嘅衫裙就大派用場。日本殿堂級設計師三宅一生ISSEY MIYAKE推出嘅Pleats Please皺褶系列，美得像一件雕塑，已成為時裝界經典，中總會長蔡冠深太太蔡關穎琴都係呢個品牌嘅擁躉。
放大鏡鏈墜一物兩用
會展尋日舉行世界傑出華人獎頒獎禮，蔡太悉心打扮而來，穿上一襲ISSEY MIYAKE湖水綠長裙及銀白色外套，高貴又優雅。原來佢迷上呢款布料多年，貪皺褶衫方便，出門時隨意一捲，要着時打開就掂。每逢出新貨，只要色彩鮮艷，都會大舉掃貨。蔡太襯衫別具心思，配上一個銀器鏈墜，睇真啲，原來係一個放大鏡，方便佢出席音樂會時睇清楚場刊內容，實在係美觀又實用。
着得靚靚而來，捧邊個場呢？原來係有份攞獎嘅華裔著名男高音莫華倫（Warren）。蔡太學過唱歌劇，又係香港歌劇院董事，同身為該劇院藝術總監嘅Warren梗係啱傾喇。
卓妮