中環出更：田少慨嘆香港豪唔起
旅遊發展局主席田北俊一向愛遊艇，佢不但擁有豪華遊艇，仲同志同道合嘅朋友一齊擁有一間遊艇會。不過講起遊艇會，田少就有啲感慨，原因係港府擔心被人認為吹捧有錢人，激化貧富懸殊，所以一切超豪設施，政府都一律唔批。
田少早喺十幾年前與前香港總商會主席鄭維志等人合資經營遊艇會，就係現時位於西貢嘅Hong Kong Marina。呢間一層樓高嘅粉橙色建築物位於西貢輋徑篤路，好有鄉郊氣息，又富有法國南部歐陸風情，令人感覺遠離塵囂。建築物裏面主要係一間餐廳，提供中西美食，同埋為上船遊玩嘅客人提供飲食畀佢哋帶上船，不過講到點解唔將佢發展成為一間小型酒店？田少就好無奈咁話，因為政府唔批。因此個會除咗不斷為遊艇嘅船主改善停船嘅設施，可以改善嘅空間就好有限。
話唔驚激化貧富懸殊
田少話，香港作為一個世界城市，應該為豪得起嘅人提供最豪嘅設備，「使乜驚畀人話激化貧富懸殊？」好似蒙地卡羅咁，當地政府都大力支持興建頂級設施，包括大型賭場、遊艇會、購物大道、跑車賽道等，總之應有盡有，你睇《007占士邦》電影就知道啦！
田少仲爆料話，據佢所知，西九文娛藝術區最初都考慮設有豪華遊艇停泊區，構思就係好似蒙地卡羅咁，泊滿要幾豪就有幾豪嘅遊艇，不過終於都因為怕畀人話激化貧富懸殊，決定唔搞，真係可惜。
講番佢呢間Hong Kong Marina，田少話眼見會員嘅遊艇質素的確不斷提升，啲船愈嚟愈大，亦愈嚟愈豪，而愈大嘅船，每呎泊船費就愈貴。總之田少為興趣而搞嘅遊艇會，的確係一盤生意，不過礙於無法有大發展，所以係一盤唔會令佢發大達嘅生意。
不過對田少嚟講，一個人有錢、有時間、有健康，人生就已經寫意到極。田少都係呻吓嘅啫，佢話一坐船出海，就乜嘢煩惱都唔諗㗎喇。
卓妮