政情：潘潔唔認搵下屬擋箭
政府最近宣布強制立法停車熄匙，隨即激起運輸業界怒火，環境局局長邱騰華見風頭火勢，前日《城市論壇》討論停車熄匙派出環境保護署副署長陳嘉信頂硬上，為自己擋駕。環境局副局長潘潔尋日喺立法會環境事務委員會會議上，為邱騰華冇去《城市論壇》狡辯，佢身為政治問責官員，睇嚟佢唔多明政治問責嘅意義。
議員陳健波尋日喺立法會，特意「讚賞」陳嘉信前日出席《城市論壇》為停車熄匙解畫嗰陣表現淡定，但始終停車熄匙咁有爭議性，奉勸陳嘉信要好小心處理呢個議題。議員甘乃威對邱騰華同潘潔兩個喺個論壇上都唔見影，表示好不滿，因為停車熄匙係一項政策，點解推個公務員出嚟解畫。
潘潔狡辯，話陳嘉信係負責處理停車熄匙，所以《城市論壇》由佢出席，而邱騰華會喺聽日立法強制停車熄匙首讀及二讀時現身，又話自己之前都有出過嚟解畫，死撐話係一個團隊分工合作。事實係問責官員要負嘅政治責任，唔係公務員可以承擔，而佢口中所講嘅團隊精神，唔知代罪羔羊陳嘉信點諗呢。