政情：張學明北上懶理補選
中央定性所謂嘅5‧16「五區公投」違反《基本法》，建制派亦決定予以杯葛，大家盡量冷卻補選氣氛。我哋早前講過，民建聯號召班中委5‧16去拜訪澳門。原來民建聯立法會議員張學明嗰日仲另有節目，就係同新界社團聯會班弟兄齊齊去廣州坐高鐵，當補選無發生過一樣！
張學明早前率先爆料，話有鄉事中人極之不滿公社兩黨搞嘅所謂「五區公投」，拒絕借出場地畀特區政府喺5‧16做投票站。尋日佢又爆料話，為慶祝新界社團聯會成立廿五周年，佢哋會搞連串慶祝活動，頭炮就係五百人嘅高鐵團。呢個團五月十四日早上由元朗出發去廣州，然後由廣州坐高鐵去武漢，沿途仲有內地鐵道部工程師講解，到當地仲獲得湖北省政府接待，不過佢哋喺5‧16補選投票日先至坐兩點半嗰班高鐵，由武漢返港。
雖然新界社團聯會理事長溫悅球話，相信坐兩點半高鐵起程返港，應該仲有時間去投票，但張學明就無講明返港後會唔會去投票，大家心照不宣啦！