政情：避政改狙擊煲呔曾快閃

政府推出冇改政改方案，終極普選聯盟都講明唔收貨，身為普選聯成員嘅白鴿黨副主席劉慧卿早前仲話，如果政改方案再遭否決，煲呔曾要引咎辭職。劉慧卿尋日繼續狙擊煲呔曾，話佢作為特首，推行政改有責任尋求各方支持，唔係拋出方案後，就闊佬懶理咁不負責任喎。點知煲呔曾出發去上海睇世博前不以為然回應話，依家唔係講責任嘅時候，最緊要係保持客觀冷靜，尋求共識。佢三言兩語就閃咗去，同佢當年話要「玩鋪勁」嘅態度完全大相逕庭！