政情：胡曉明揭同星爺合作之謎
成立三年幾嘅香港專業及資深行政人員協會（專資會），最近換領導層，由前全國政協委員胡法光兒子胡曉明（Herman），接替容永祺做會長。Herman同創會會長容永祺尋日帶齊班專資會骨幹見傳媒，常務副會長、恒基陽光資產管理主席謝偉銓同身為理事嘅前地政總署署長劉勵超等都有現身講大計，仲有去年先入會嘅廠商會副會長施榮懷。
接掌專資會
Herman做咗掌門人之後，專資會大計多多，預告會就政改同市民關注嘅房屋政策同最低工資問題做研究。工程師出身嘅Herman，以前同日本三菱合作，依家集中做房地產生意，仲自己
實房屋政策呢一瓣，又編製骨幹會員通訊錄，加強專資會透明度，睇得出Herman接掌專資會，同佢開拓房地產一樣，想大幹一番喎。
Herman係菱電集團第二代掌門人，大家都想知，「星爺」周星馳（圓圖）六年前點解睇中菱電，一齊合作發展山頂普樂道天比高洋房項目。Herman尋日解開謎團，原來星爺係鍾意菱電夠細，信得過！佢話同星爺係經朋友介紹認識，香港大型發展商唔少，但管理層出現人事變動係家常便飯，菱電係家族生意，由胡氏三父子話事，除咗佢同爸爸，仲有細佬胡曉亮，人事穩定，令人安心，呢個就係星爺搵菱電合作嘅原因嘞。