政情：白鴿黨補選日打爛公社飯碗
公民黨、社民連為「五區公投」搏到盡，力谷選民喺下月立法會補選中投票，但民主黨不但唔幫手拉票，仲喺投票當日搞離境旅行團趕客。民主黨立法會議員甘乃威聯同東區區議員梁淑楨及趙家賢，喺正下月十五及十六日合辦母親節東莞美食兩日團，主打入住五星級酒店，享用客家風味宴及一魚三味養生宴，並參觀多個景點，星期日投票日仲要食埋晚飯至返歸，搞到好似驚死啲團友趕得切去投票咁。
搞旅行團趕客
民主黨近日向鰂魚涌康怡花園街坊派發東莞團宣傳單張，公民黨睇到單張火到滾，事關旅行團明顯向康怡中產選民埋手。負責策劃東莞團嘅梁淑楨解釋，該黨已經搞咗母親節團好多年，一向遲母親節一星期出發，讓一眾母親可以喺正日同仔女慶祝，而且佢哋決定出發日期仲早過選舉事務處公布補選日期，所以無存在任何陰謀，佢仲寫包單話，十六日當晚九點幾就會返到嚟，有足夠時間畀選民投票，但選民投唔投票就要自行決定嘞！
港島多個區夾埋，旅行團預計有七部旅遊車一齊出發，浩浩蕩蕩咁，都扯走三百人㗎。