政情：新政府總部無運行

立法會喺今年一月千辛萬苦通過高鐵撥款，立法會被圍，據知有關方面事後認真檢視過新政府總部同立法會大樓嘅布局，發現如果歷史重演，全部都走唔甩。睇番現時添馬艦工程圖則，東面和西面分別各有兩個行人及車輛出入口，另有兩條分別連接金鐘海富中心及中信大廈嘅天橋，但都無一條離開添馬艦嘅秘道，只係得一條連接政府大樓及立法會嘅秘道。總之成個「門常開」都係一個孤島，被圍困起上嚟，完全可以被公眾堵塞，無路可走。

政府總部容許直升機降落，將一眾高官議員救走得唔得？好似泰國官員咁，被紅衫軍攻佔國會後要擔梯爬牆坐直升機撤離。答案係：唔得，原因係建築物嘅設計無法負荷直升機嘅重量。不如諗吓起個大啲嘅廚房，儲定足夠嘅糧水仲實際。

堪輿學家指無靠山風水差

其實新總部叫做「門常開」都夠晒諷刺，煲呔曾施政連番失誤，又唔聽市民意見，做法同「門常開」嘅精神漸行漸遠。尋日中大發表嘅民意調查結果，更反映一個政府嘅總部設計得幾靚都冇用，市民處於水深火熱才是事實。「門常開」起得好快，可以講係快高長大，因為要趕住起好，畀煲呔曾後年任期滿前入伙。唔知佢入伙當日，要唔要同時諗埋，如果畀憤怒嘅市民圍困，應該點算。

堪輿風水學家楊天命話，新政府總部所在地猶如一個荒島孤立無援，雖然搬到維港海邊有旺財之效，但遠離靠山意味政府權力愈來愈少，加上「門常開」設計中空，代表無權力，亦恍如一個「口」字，較多口舌是非之紛爭，造成政治爭拗，影響管治威信。楊師傅話，原本設立秘道可有「潛龍」之意，將股龍氣帶入新政府總部，可略為代替靠山之效，權力得以維持。不過現實情況係新嘅政府總部既無靠山又無潛龍，真係戥佢閉翳。