中環出更：蔡冠深歎日菜貴精不貴多
中總會長蔡冠深（Jonathan），生意瓣數多，原來佢更精於「搵食」。貴為「海產大王」蔡繼有之後，自小食盡各地海鮮，今天經營西村日本料理，將美食心得大晒冷，由日本深海吞拿，到澳洲黑邊鮑魚，天天給客人驚喜。Jonathan話，寧願將三餐夾埋一餐食，食少啲，都要食好嘢。
卓妮日前喺尖沙咀捐窿捐罅搜尋美食，行經馬哥孛羅香港酒店間西村，撞見Jonathan同太太蔡關穎琴（Janice）喺度撐枱腳，西村一向係Jonathan嘅「飯堂」，小至一碟醬油，大至一棵超甜粟米，都由佢家族供應，唔鮮唔靚，寧願摒棄。
最緊要新鮮
Jonathan對新鮮兩個字，分外執着，佢一針見血道出飲食真諦話：「真正海上鮮，白灼已鮮甜無比，如果要加醬料才覺好味，只係大廚夠叻而已。」
西村大廚屬大師級，呢日知道大老闆駕到，精選咗一盤海鮮拼盤，拼盤排列方法講究，味道由淡至濃，先食
魚、帶子、深海魚、油甘魚、加拿大嫩蝦、吞拿魚，最後係螢光魷魚，拌以酸麵豉醬，鮮味昇華百倍。吞拿魚矜貴之處，在於只選魚身中間嘅魚腩部位，肉質超甜，入口即融，一小片賣一百五十多元。
Jonathan仲柯打咗日式蒸魚、日本茄子、超甜粟米；蔡太就點咗最愛嘅海膽壽司、燒吞拿魚、生菜包三文魚，再來一碟清甜日本柚子做甜品。
咪以為Jonathan係洗腳唔抹腳嘅富家子，原來喺佢接掌家族生意初期，事事由低做起，每朝凌晨四點，穿梭魚產批發市場，向漁民收購魚獲。Jonathan磨練出超高EQ，如今縱橫商場，無往而不利，最近仲躋身《福布斯》香港富豪榜，佢真係要講聲：多謝爸爸！
卓妮